இலங்கை கிரிக்கெட் வீரர் திசாரா பெரேரா சர்வதேச கிரிக்கெட்டில் இருந்து ஓய்வு பெறுவதாக அறிவித்துள்ளார்.
இலங்கை கிரிக்கெட் வட்டாரங்களின்படி, 32 வயதான திசாரா பெரேரா சர்வதேச கிரிக்கெட்டில் இருந்து ஓய்வு பெறுவதற்கான தனது முடிவை நிர்வாகத்திற்கு தெரிவித்திருந்தார்.
இலங்கை ஒருநாள் அணியில் இருந்து பெரேரா உட்பட பல மூத்த கிரிக்கெட் வீரர்களை கைவிடுவது குறித்து எஸ்.எல்.சி தேர்வாளர்கள் பரிசீலித்து வருவதாக சமீபத்தில் தெரிவிக்கப்பட்டதையடுத்து இவரின் முடிவு வந்துள்ளது.
இதன் விளைவாக, சர்வதேச கிரிக்கெட்டில் இருந்து ஓய்வு பெற பெரேரா முடிவு செய்துள்ளதாக கிரிக்கெட் வட்டாரங்கள் தெரிவித்தன.
வரவிருக்கும் பங்களாதேஷ் மற்றும் இங்கிலாந்து ஒருநாள் சுற்றுப்பயணங்களுக்கு இலங்கை ஒருநாள் அணியில் இருந்து பல மூத்த கிரிக்கெட் வீரர்களை கைவிடுவது குறித்து ஆலோசித்து வருவதாக இலங்கை கிரிக்கெட் தேர்வாளர்கள் முன்னர் அறிவித்தனர்.
மூத்த வீரர்களான திமுத் கருணாரத்ன, ஏஞ்சலோ மத்யூஸ், தினேஷ் சந்திமல், சுரங்கா லக்மல் மற்றும் திசாரா பெரேரா ஆகியோரை வரவிருக்கும் வரையறுக்கப்பட்ட ஓவர் சுற்றுப்பயணங்களுக்கு தேர்வாளர்கள் பரிசீலிக்க வாய்ப்பில்லை என்று மூத்த எஸ்.எல்.சி அதிகாரி ஒருவர் தெரிவித்தார்.
இலங்கையின் வரவிருக்கும் அட்டவணையில் பங்களாதேஷில் ஒருநாள் தொடர் மற்றும் இங்கிலாந்தில் ஒருநாள் மற்றும் டி 20 தொடர்கள் உள்ளன.