இந்தியப் பிரதமர் நரேந்திர மோடி ஏப்ரல் 4 ஆம் திகதி இலங்கைக்கு தனது அதிகாரப்பூர்வ பயணத்தைத் தொடங்க உள்ளார்.
அவரது வருகையை முன்னிட்டு, சீரான போக்குவரத்து மற்றும் பாதுகாப்பை உறுதி செய்வதற்காக பொலிஸார் சிறப்பு போக்குவரத்துத் திட்டத்தை அறிவித்துள்ளது.
ஏப்ரல் 4 ஆம் திகதி, கொழும்பு-கட்டுநாயக்க அதிவேக நெடுஞ்சாலை மற்றும் பேஸ்லைன் வீதி மாலை 6 மணி முதல் இரவு 10 மணி வரை மூடப்படவுள்ளது. கட்டுநாயக்க சர்வதேச விமான நிலையத்திற்குச் செல்லும் பயணிகள் இந்த வீதிகள் மூடப்படுவதை கருத்தில் கொண்டு, அதற்கேற்ப தங்கள் பயணங்களைத் திட்டமிடுமாறு அறிவுறுத்தப்படுகிறார்கள்.
மேலும், ஏப்ரல் 5 ஆம் திகதி, காலி முகத்திடல், சுதந்திர சதுக்கம் மற்றும் பத்தரமுல்லையில் உள்ள அபே காமா வளாகம் போன்ற முக்கிய இடங்களைச் சுற்றியுள்ள பல சாலைகள் அவ்வப்போது மூடப்படும். சிரமத்தைக் குறைக்க மாற்று வழிகளைப் பயன்படுத்துமாறு சாரதிகள் கேட்டுக் கொள்ளப்படுகிறார்கள்.
பிரதமர் மோடியின் வருகையின் போது பாதுகாப்பை உறுதி செய்வதற்காக இந்த நேரங்களில் பொதுமக்களின் ஒத்துழைப்பையும் புரிதலையும் பொலிஸார் கோரியுள்ளனர்.